ఇండియన్ ప్రీమియర్ లీగ్ 2025లో నేటి మ్యాచ్ రాయల్ చాలెంజర్స్ బెంగళూరు మరియు చెన్నై సూపర్ కింగ్స్ మధ్య జరుగుతోంది. ఈ పోరు బెంగళూరులోని చిన్నస్వామి స్టేడియంలో ప్రారంభమైంది. టాస్ గెలిచిన చెన్నై జట్టు కెప్టెన్ మహేంద్ర సింగ్ ధోనీ బౌలింగ్ ఎంచుకున్నాడు. ఈ మ్యాచ్‌లో సీఎస్కే గెలిచినా లేదా ఓడినా, టోర్నీలోని దాని స్థితిపై ఎలాంటి ప్రభావం ఉండదు.
చెన్నై ఇప్పటికే ప్లేఆఫ్స్ నుంచి నిష్క్రమించింది. ఇప్పటివరకు 10 మ్యాచ్‌లు ఆడిన సీఎస్కే, కేవలం 2 విజయాలతో పాయింట్ల పట్టికలో చివరిస్థానంలో ఉంది. టీమ్ ప్రదర్శన సంతృప్తికరంగా లేకపోయినా, ధోనీ జట్టులో ఎలాంటి మార్పులు చేయలేదు అని తెలిపారు. నేటి పోరుకు అదే జట్టుతో బరిలోకి దిగుతున్నారు.
మరోవైపు, బెంగళూరు టీమ్ ఈ మ్యాచ్‌లో గెలిస్తే ప్లేఆఫ్స్ దశలోకి ప్రవేశించనుంది. ఇప్పటివరకు ఆర్సీబీ 10 మ్యాచ్‌లు ఆడి, అందులో 7 విజయాలు సాధించింది. వరుస విజయాలతో జోష్ మీద ఉన్న ఆర్సీబీకి ఈ మ్యాచ్ కీలకం. టీమ్‌లో ఒక్క మార్పు చోటుచేసుకుంది – జోష్ హేజెల్‌వుడ్ స్థానంలో లుంగీ ఎంగిడి జట్టులోకి వచ్చాడు.
ఈ మ్యాచ్‌పై అభిమానుల్లో భారీ ఆసక్తి నెలకొంది. చెన్నై జట్టు టోర్నీ నుంచి నిష్క్రమించినా, ధోనీ నాయకత్వంలో టీమ్ ఎలా పోరాడుతుందో చూడాలి. ఆర్సీబీ మాత్రం ఈ గెలుపుతో తమ ప్లేఆఫ్ ఆశలను బలంగా నిలబెట్టుకునే అవకాశంలో ఉంది. మ్యాచ్ ఫలితం ఎంత ఆసక్తికరంగా ఉంటుందో చూడాలి.
