ప్రపంచంలో ప్రతి ఒక్కరికీ వారి వారి అభిరుచులు ఉంటాయి. కొందరు తమ అభిమానాన్ని చూపించే విధానం అద్భుతంగా, వినూత్నంగా ఉంటుంది. స్విట్జర్లాండ్‌కు చెందిన డ్యూ అనే యువతి, తనకు ఎంతో ఇష్టమైన రెడ్ బుల్ ఎనర్జీ డ్రింక్‌పై తన అభిమానాన్ని చాటుకోవడానికి, అచ్చం ఆ డ్రింక్ క్యాన్‌పై ఉండే బార్‌కోడ్‌ను తన చేతిపై టాటూ వేయించుకుంది. ఈ టాటూ కోసం ఆమె దాదాపు 600 డాలర్లకు పైగా ఖర్చు చేసింది. ఈ టాటూ స్కాన్ అవుతుందా అన్న అనుమానాలతో మొదలైన ప్రయోగం, ఇప్పుడు సోషల్ మీడియాలో సంచలనంగా మారింది.
టాటూ వేయించుకోవడం అంటే ఒక్క రూపాన్ని గీయించుకోవడం కాదు, అది సరిగ్గా పనిచేయాలంటే గీతల కచ్చితత, అచ్చుతప్పులేని లైన్ వర్క్ అవసరం. డ్యూ వేసుకున్న బార్‌కోడ్ టాటూ కేవలం అలంకరణ కాదు, నిజంగానే రెడ్ బుల్ క్యాన్ను ప్రాతినిధ్యం వహిస్తూ, స్టోర్లలో హ్యాండ్‌హెల్డ్ స్కానర్‌తో స్కాన్ చేయగలిగింది. దీనికి ఆమె చెల్లెలు వేసిన బొమ్మ ఆధారంగా టాటూ డిజైన్‌లో ఒక పురుగు బార్‌కోడ్‌ను కొరుకుతున్నట్లు వినూత్నంగా రూపకల్పన చేయించారు.
ఈ టాటూ వాస్తవంగా పనిచేస్తుందా అనే సందేహంతో డ్యూ మొదట్లో సైతం స్పష్టంగా చెప్పలేకపోయింది. కానీ టాటూ వేసిన మరుసటి రోజు తన పనిచేసే చోట స్కానర్‌తో పరీక్షించగా, అది రెడ్ బుల్ క్యాన్ను గుర్తించి బిల్లింగ్‌లో చేర్చింది. ఆమె ఇదంతా వీడియోగా తీసి ఇన్‌స్టాగ్రామ్‌లో షేర్ చేయగా, ఇప్పటి వరకు 19 మిలియన్లకు పైగా వ్యూస్ వచ్చాయి. “ఇది నిజంగా పనిచేస్తుంది, సరైన యాంగిల్‌లో స్కాన్ చేస్తే” అంటూ ఆమె క్యాప్షన్‌లో పేర్కొంది.
ఈ టాటూ వ్యవహారంపై నెటిజన్ల అభిప్రాయాలు విభిన్నంగా వ్యక్తమయ్యాయి. కొందరు ఈ ఐడియాను ఆదరించి, తామూ ఇష్టమైన పానీయాల బార్‌కోడ్‌లు వేయించుకోవాలని ఉత్సాహం చూపిస్తుండగా, మరికొందరు ఇది తాత్కాలిక మోజే అని అభిప్రాయపడ్డారు. “భవిష్యత్తులో కంపెనీ బార్‌కోడ్ మార్చితే?” అనే ప్రశ్నతో ఆందోళన వ్యక్తం చేశారు. అయితే, టాటూ ఆర్టిస్ట్ కచ్చితమైన లైన్ వర్క్‌ను పంచడంతో, ఇది టెక్నాలజీ, కళ రెండింటి మేళవింపుగా నిలిచిందని చాలామంది కొనియాడారు.
