పల్నాడు జిల్లా అమరావతి గ్రామంలోని SRR లాడ్జి 206 నంబర్ గదిలో పేకాట స్థావరం నిర్వహిస్తున్నట్టు సమాచారం అందుకున్న పోలీసులు, ఎస్పీ కంచి శ్రీనివాసరావు ఆదేశాల మేరకు సి.ఐ Y. అచ్చయ్య నేతృత్వంలో ఈరోజు మధ్యాహ్నం 2.30 గంటలకు దాడి నిర్వహించారు. సిఐ సిబ్బందితో కలిసి నిర్వహించిన ఈ దాడిలో పేకాట ఆడుతున్న 10 మందిని పోలీసులు అదుపులోకి తీసుకున్నారు.
దాడి సమయంలో పోలీసులు అక్కడున్న 10,38,000 రూపాయల నగదు, 11 సెల్ ఫోన్లు, 1 బైక్‌ను స్వాధీనం చేసుకున్నారు. ఈ పేకాట స్థావరాన్ని నడిపిస్తున్న ప్రధాన వ్యక్తులు కూడా అదుపులోకి తీసుకోబడ్డారు. పోలీసులు సుదీర్ఘంగా పేకాట స్థావరంపై నిఘా పెట్టి, సరిగ్గా సమాచారంతో ఆకస్మిక దాడి నిర్వహించడం విశేషం.
పేకాట స్థావరం అమరావతి పోలీస్ స్టేషన్ పరిధిలో ఉండటంతో చట్ట వ్యతిరేక కార్యకలాపాలకు పాల్పడే వారిపై కఠిన చర్యలు తీసుకోవాలని ఎస్పీ ఆదేశించినట్లు సి.ఐ అచ్చయ్య తెలిపారు. పేకాటలతో ప్రజల ఆర్ధిక స్థితి దెబ్బతింటుందని, ఇలాంటివి నియంత్రించేందుకు పోలీసులు కట్టుదిట్టమైన చర్యలు కొనసాగిస్తామని స్పష్టం చేశారు.
చట్టానికి విరుద్ధంగా ఏ కార్యకలాపాలు జరుగుతున్నా పోలీసులకు సమాచారం అందించాలని, లేకపోతే పక్కా ఆధారాలతో చట్టప్రకారం కేసులు నమోదు చేసి కఠినంగా వ్యవహరిస్తామని పోలీసులు హెచ్చరించారు. ప్రజల సహకారం ఉండాలి, సమాజం నుంచి పేకాట, చట్ట వ్యతిరేక కార్యకలాపాలను సమూలంగా నిర్మూలిస్తామని పోలీసులు అన్నారు.
