వాయనాడ్ ఎంపీ మరియు కాంగ్రెస్ అగ్రనేత ప్రియాంకా గాంధీ ఇటీవల ప్రకటించినట్లుగా, కేరళలోని వాయనాడ్ జిల్లాకు చెందిన జీఐ-ట్యాగ్ రోబస్టా కాఫీకి కేంద్ర ప్రభుత్వం “ఒక జిల్లా – ఒక ఉత్పత్తి” (ODOP) కార్యక్రమంలో వ్యవసాయ విభాగంలో గుర్తింపు లభించింది. ఈ గౌరవాన్ని కేరళలో పొందిన తొలి ఉత్పత్తిగా వాయనాడ్ కాఫీ నిలవడం గర్వకారణమని ఆమె అభిప్రాయపడ్డారు. ఇది వాయనాడ్ రైతుల కష్టానికి, నాణ్యమైన సాగు విధానాలకు ఫలితంగా చరిత్రలో ఒక మైలురాయి అని ఆమె పేర్కొన్నారు.
ఓడీఓపీ కార్యక్రమం, ప్రతి జిల్లాకు చెందిన ప్రత్యేక ఉత్పత్తిని గుర్తించి దేశవ్యాప్తంగా బ్రాండ్‌గా అభివృద్ధి చేసే ప్రభుత్వ యోజన. వాయనాడ్ రోబస్టా కాఫీకి గల ప్రత్యేకమైన రుచి, భౌగోళిక లక్షణాలు, సంప్రదాయ సాగు విధానాలు దీన్ని గుర్తింపు పొందేలా చేశాయి. నెదర్లాండ్స్‌కు పంపిన శాంపిల్స్ 86, 88 కప్ స్కోర్లతో స్పెషాలిటీ కాఫీగా గుర్తింపు పొందడం, అంతర్జాతీయ ప్రమాణాలకు అనుగుణంగా వాయనాడ్ కాఫీని నిలబెట్టింది.
క్లైమేట్ స్మార్ట్ కాఫీ ప్రాజెక్ట్ ద్వారా వాయనాడ్ కాఫీకి అంతర్జాతీయ మార్కెట్‌దిశగా నడిపే మార్గం ఏర్పడింది. ఈ ప్రాజెక్ట్‌లో భాగంగా చిన్న రైతులకు శిక్షణ, నాణ్యత ప్రమాణాలపై అవగాహన కల్పించడంతో పాటు, ఉత్పత్తిలో ఉన్నతమైన ప్రమాణాలు పాటించేందుకు తోడ్పడుతోంది. వాయనాడ్ జిల్లాలో 80 శాతం మంది చిన్న, గిరిజన రైతులు ఈ ప్రాజెక్ట్ ద్వారా లాభాలు పొందుతున్నారు.
ఈ ఒడీఓపీ గుర్తింపు కేవలం వాణిజ్య పురోగతికే కాదు, పర్యావరణ పరిరక్షణ, జీవవైవిధ్య సంరక్షణకు కూడా ప్రాధాన్యత ఇస్తోంది. ‘వాయనాడ్ కాఫీ పార్క్’ ప్రాజెక్ట్ ద్వారా గిరిజన, మహిళా రైతులకు మార్కెట్‌లో ప్రాప్యత పెరిగింది. వాయనాడ్ కాఫీ ఇప్పుడు గ్లోబల్ స్పెషాలిటీ మార్కెట్‌లో ఓ ప్రత్యేక స్థానాన్ని సంపాదించుకోగా, రాష్ట్ర స్థాయిలో కాఫీ సాగు చేసే రైతులకు ఉత్సాహం కలిగించే ఘటనగా నిలుస్తోంది.
