కాంగ్రెస్ నేత, మాజీ ఎమ్మెల్యే మైనంపల్లి హనుమంతరావుపై బీఆర్ఎస్ ఎమ్మెల్సీ దాసోజు శ్రవణ్ తీవ్రంగా విరుచుకుపడ్డారు. మల్కాజిగిరిలో ఆయన నయీంలా వ్యవహరిస్తున్నారని, బీఆర్ఎస్ కార్యకర్తలను భయభ్రాంతులకు గురిచేస్తున్నారని ఆరోపించారు. హైదరాబాద్‌లో రౌడీయిజానికి ఎంతగానో ప్రోత్సాహం లభిస్తోందని, దీనికి తాజా ఉదాహరణ మల్కాజిగిరిలో జరుగుతున్న పరిణామాలని అన్నారు. ప్రజాస్వామ్యంలో ఇటువంటి దాడులు తగవని, ఈ విధంగా సాగితే ప్రజల నమ్మకాన్ని కోల్పోతారని హెచ్చరించారు.
శ్రవణ్ ఆవేదన వ్యక్తం చేస్తూ, బీఆర్ఎస్ కార్యకర్తలపై అక్రమంగా కేసులు పెట్టి వేధించడాన్ని తీవ్రంగా ఖండించారు. ఇది ప్రజాపాలనా? లేక రౌడీ పాలనా? అని ప్రశ్నించారు. ముఖ్యమంత్రి రేవంత్ రెడ్డి, డీజీపీ ఈ వ్యవహారంపై తక్షణమే స్పందించాల్సిన అవసరం ఉందని డిమాండ్ చేశారు. మైనంపల్లిలో మార్పు వస్తుందని అనుకున్నామని, కానీ ఆయన ప్రవర్తనలో మార్పు ఎక్కడా కనిపించడంలేదని అన్నారు.
గాంధీ భవన్‌లో జరిగిన మీడియా సమావేశంలో కేటీఆర్‌ను టార్గెట్ చేస్తూ మైనంపల్లి చేసిన వ్యాఖ్యలపై కూడా శ్రవణ్ తీవ్ర అభ్యంతరం వ్యక్తం చేశారు. ఆయన వ్యాఖ్యలను ఖండిస్తూ, ఒకప్పుడు కేటీఆర్ కాళ్లు మొక్కిన వ్యక్తి, ఇప్పుడు పార్టీని విమర్శించడమంటే విశ్వాసాన్ని విస్మరించడమేనని చెప్పారు. బీఆర్ఎస్ పార్టీ ఆయనకు ఎన్నో అవకాశాలు ఇచ్చిందని, కానీ ఆయన పార్టీకి నైతికంగా కట్టుబడి ఉండలేదని ధ్వజమెత్తారు.
చీమల పుట్టలోకి పాము చొరబడినట్టే మైనంపల్లి మల్కాజిగిరిలోకి చొరబడి రౌడీయిజానికి పాల్పడుతున్నారని మండిపడ్డారు. ఈ వ్యవహారంపై తాము పోలీసులకు ఫిర్యాదు చేస్తామని చెప్పారు. ప్రజలు కూడా ఇలాంటి దాడులపై మౌనం విడిచి స్పందించాల్సిన సమయం వచ్చిందని అన్నారు. ప్రజాస్వామ్య పరిరక్షణలో భాగంగా రాజకీయ నేతల బాధ్యత ఉందని, మైనంపల్లి చర్యలు అందుకు విరుద్ధమని విమర్శించారు.
