అసత్య ప్రచారాలు, విద్వేషకర కంటెంట్‌ను అడ్డుకునే చర్యల్లో భాగంగా గూగుల్ యూట్యూబ్ వేదికపై భారీ శుభ్రపరిచే ప్రక్రియను ప్రారంభించింది. తాజాగా చైనా, రష్యా వంటి దేశాలకు చెందిన సుమారు 11 వేల యూట్యూబ్ ఛానళ్లను తొలగించినట్లు గూగుల్ అధికారికంగా ప్రకటించింది. ఈ ఛానళ్లు నిరాధార సమాచారం, ప్రాచుర్య పథకాల ద్వారా ప్రజలను మభ్యపెడుతున్నాయని గూగుల్ స్పష్టం చేసింది.
ఈ చర్యల్లో భాగంగా 7,700కి పైగా ఛానళ్లు ఒక్క చైనాకు చెందినవే కావడం గమనార్హం. వీటిలో పీపుల్స్ రిపబ్లిక్ ఆఫ్ చైనా ప్రభుత్వానికీ, అధ్యక్షుడు జిన్‌పింగ్‌కు మద్దతుగా ప్రచార కంటెంట్‌ను ఉద్దేశపూర్వకంగా అందించినట్లు గూగుల్ పేర్కొంది. భారత్‌లో చైనా పక్షాన ప్రాచుర్యానికి ఈ ఛానళ్లు ఉపయోగపడుతున్నట్లు కూడా గమనించిందని వెల్లడించింది.
ఇంకా, రష్యాకు చెందిన 2 వేల యూట్యూబ్ ఛానళ్లు కూడా తొలగించబడ్డాయి. వీటిలో నాటో, ఉక్రెయిన్‌లపై విమర్శలు చేస్తూ, రష్యా అనుకూలంగా ప్రాచుర్య కంటెంట్‌ను ప్రచారం చేసినట్లు గూగుల్ గుర్తించింది. అంతేకాదు, ఈ ఛానళ్ల వెనుక రష్యాలోని కొన్ని ప్రభుత్వ సంబంధిత సంస్థలు ఉన్నట్లు గూగుల్ విచారణలో తేలింది.
ఇవేగాక, ఇజ్రాయెల్‌, తుర్కియే, ఇరాన్‌, ఘనా, అజర్‌బైజాన్‌, రొమేనియా వంటి దేశాలకు చెందిన ఛానళ్లను కూడా తొలగించినట్లు తెలిపింది. ఈ ఛానళ్లు మత విద్వేషాలు రెచ్చగొట్టేలా, భద్రతను భంగపరిచేలా కంటెంట్‌ను వ్యాప్తి చేస్తున్నాయని గూగుల్ అభిప్రాయపడింది. డిజిటల్ మాధ్యమాల్లో వాస్తవాధారాలే ప్రాధాన్యమని, తప్పుడు సమాచారానికి యూట్యూబ్ వేదిక కాదని గూగుల్ స్పష్టంచేసింది.
