శ్రీ చైతన్య విద్యా సంస్థలపై తెలంగాణ మహిళా కమిషన్ తీవ్ర ఆగ్రహం వ్యక్తం చేసింది. బాచుపల్లిలో జరిగిన ఇంటర్ ఫస్ట్ ఇయర్ విద్యార్థిని వర్షిణి ఆత్మహత్య కేసును అత్యంత సమగ్రంగా పరిశీలించేందుకు కమిషన్ ముందుకొచ్చింది. విద్యాసంస్థల్లో విద్యార్థుల భద్రత, మానసిక ఆరోగ్యం, హాస్టల్ పర్యవేక్షణ గురించి అనేక ప్రశ్నలు లేవుతున్న నేపథ్యంలో మహిళా కమిషన్ ఈ ఘటనను సాధారణ సంఘటనగా తీసుకోకుండా తక్షణ చర్యలు ప్రారంభించింది. దీనిలో భాగంగా కమిషన్ చైర్పర్సన్ నేరెళ్ల శారద స్వయంగా జోక్యం చేసుకోవడం ప్రాధాన్యత సంతరించుకుంది.
ఈ ఘటనపై స్పష్టమైన వివరణ కోరుతూ శ్రీ చైతన్య కళాశాలల చైర్మన్కు ఇవాళ సమన్లు జారీ చేశారు. డిసెంబర్ 10న కమిషన్ ముందు వ్యక్తిగతంగా హాజరు కావాలని ఆదేశించారు. విద్యార్థుల పర్యవేక్షణలో నిర్లక్ష్యం జరిగిందా? హాస్టల్లో సెక్యూరిటీ, కౌన్సెలింగ్ వ్యవస్థలు సరిగా అమలయ్యాయా? విద్యార్థులు ఒత్తిడికి గురయ్యే పరిస్థితులు ఉన్నాయా? అనే అంశాలపై కమిషన్ సమగ్ర వివరాలు కోరినట్లు సమాచారం. ఈ కేసును అత్యంత సీరియస్గా తీసుకుంటున్నట్లు కమిషన్ స్పష్టం చేసింది.
మహబూబ్నగర్ జిల్లా మక్తల్కు చెందిన వర్షిణి (16) బాచుపల్లి శ్రీ చైతన్య ఇంటర్ కాలేజీలో ఫస్ట్ ఇయర్ చదువుతూ హాస్టల్లో ఉరేసుకుని ఆత్మహత్య చేసుకోవడం రాష్ట్రవ్యాప్తంగా కలకలం రేపింది. ఘటనను గమనించిన హాస్టల్ సిబ్బంది వెంటనే పోలీసులకు సమాచారం ఇవ్వగా, పోలీసులు చేరుకుని కేసు నమోదు చేశారు. కోచింగ్ ప్రెషర్, హాస్టల్ వాతావరణం, విద్యా ఒత్తిడి వంటి కారణాలపై అనుమానాలు వ్యక్తమవుతున్నాయి. అయితే అధికారికంగా ఇది ఎందుకు జరిగిందన్న దానిపై స్పష్టత రాలేదు.
వర్షిణి తల్లిదండ్రులు తమ కుమార్తె మరణానికి కళాశాల యాజమాన్యమే బాధ్యత వహించాల్సిందిగా డిమాండ్ చేశారు. విద్యార్థులపై అధిక ఒత్తిడి, సరైన పర్యవేక్షణ లేకపోవడం, సమస్యలను గుర్తించే వ్యవస్థ లేని కారణంగా ఈ ఘటన జరిగిందని వారు ఆరోపిస్తున్నారు. ఈ నేపథ్యంలో మహిళా కమిషన్ జోక్యం మృతురాలి కుటుంబానికి కొంత న్యాయం జరిగేలా చేస్తుందనే ఆశ వ్యక్తమవుతోంది. ఇదే సమయంలో విద్యాసంస్థల్లో విద్యార్థుల సురక్షిత వాతావరణం కోసం ప్రభుత్వ స్థాయిలో చర్యలు తీసుకోవాల్సిన అవసరం ఉందని పలువురు అభిప్రాయపడుతున్నారు.
