నారాయణఖేడ్ పట్టణంలోని మండల పరిషత్ బాలికల పాఠశాలలో గురువారం ఉదయం పెద్ద ప్రమాదం తృటిలో తప్పింది. తరగతి గదిలో పాఠాలు నేర్చుకుంటున్న సమయంలో పాఠశాల భవనం పైకప్పు నుంచి ఒక్కసారిగా పెచ్చులు ఊడి విద్యార్థుల ముందరే కూలిపోయాయి. దీంతో తరగతి గదిలో ఉన్న చిన్నారులు భయంతో అరిచారు. అదృష్టవశాత్తూ పెద్దగా ఎవరికి ప్రమాదం జరగకపోయినప్పటికీ, ఈ అవాంఛనీయ ఘటన స్కూల్లో ఉన్న భవనాల పరిస్థితిని మరోసారి బయటపెట్టింది.
ఈ ఘటనలో ఐదుగురు విద్యార్థులు స్వల్ప గాయాలతో బయటపడ్డారు. పెచ్చులు ఊడిపడటంతో ఒక్కసారిగా తరగతి గది వెలుపలికి పరుగులు తీశారు. వెంటనే సిబ్బంది స్పందించి పిల్లలను బయటకు తరలించడంతో మరింత ప్రమాదం జరగకుండా తప్పినట్లు తల్లిదండ్రులు బాధ వ్యక్తం చేశారు. పిల్లలు పాఠశాలకు సురక్షిత వాతావరణం కోసం పంపుతామే తప్ప ఇలాంటి ప్రమాదాలు ఎదురవుతాయని ఊహించలేదని వారు ఆవేదన వ్యక్తం చేశారు.
పాఠశాల భవనం గత కొంతకాలంగా శిథిలావస్థలో ఉందని, పలుమార్లు సమస్యలను ఎత్తిచూపినా అధికారులు పట్టించుకోలేదని తల్లిదండ్రులు ఆరోపిస్తున్నారు. కొద్దినాళ్ల క్రితమే భవనానికి మరమ్మతులు చేసినప్పటికీ, నాణ్యత లోపం కారణంగానే ఈ ఘటన జరిగిందని వారు వ్యాఖ్యానిస్తున్నారు. పాత భవనం ఉన్న తరగతి గదులను పూర్తిగా మూసివేసి, పిల్లలను తాత్కాలిక గదులకు మార్చాలని తల్లిదండ్రులు డిమాండ్ చేస్తున్నారు.
ఈ ఘటనపై స్థానికులు తీవ్ర అసంతృప్తి వ్యక్తం చేస్తూ విద్యార్థుల ప్రాణాలతో చెలగాటం ఆపాలని కోరుతున్నారు. పాఠశాల భవనాలన్నింటినీ వెంటనే పరిశీలించి ప్రమాదకరమైన గదులను ఖాళీ చేయాలని, కొత్త భవన నిర్మాణం చేపట్టాలని ప్రభుత్వాన్ని కోరుతున్నారు. అప్రమత్తతతో పిల్లల ప్రాణాలను కాపాడిన సిబ్బందిని ప్రశంసించిన వారు, భవిష్యత్తులో ఇలాంటి సంఘటనలు జరగకుండా వెంటనే చర్యలు తీసుకోవాలని డిమాండ్ చేస్తున్నారు.
