తెలంగాణలో గ్రూప్-1 నియామక ప్రక్రియపై గత కొంతకాలంగా కొనసాగుతున్న ఉత్కంఠకు ఎట్టకేలకు తెరపడింది. ఎంపికైన అభ్యర్థులకు ఊరటనిస్తూ తెలంగాణ హైకోర్టు డివిజన్ బెంచ్ ఇవాళ కీలక తీర్పును వెలువరించింది. గ్రూప్-1 నియామకాలపై గతంలో సింగిల్ బెంచ్ విధించిన స్టేను సీజే ధర్మాసనం పూర్తిగా కొట్టివేసింది. దీంతో నియామకాలపై నెలకొన్న అనిశ్చితికి ముగింపు పలికినట్లైంది.
విచారణ సందర్భంగా ఇరు పక్షాల వాదనలు సుదీర్ఘంగా విన్న కోర్టు కీలక వ్యాఖ్యలు చేసింది. గ్రూప్-1 పరీక్షలు సక్రమంగానే జరిగాయని, పరీక్ష నిర్వహణలో పూర్తి పారదర్శకత పాటించబడిందని స్పష్టం చేసింది. పరీక్షలో ఎలాంటి అవకతవకలు జరిగాయని నిరూపించే ఆధారాలు లేవని కోర్టు తేల్చి చెప్పింది. దీంతో పరీక్ష విశ్వసనీయతపై అభ్యర్థులకు నమ్మకం కలిగేలా వ్యాఖ్యలు చేసింది.
అయితే, గతంలో సింగిల్ బెంచ్ ఇచ్చిన తీర్పులో గ్రూప్-1 జనరల్ ర్యాంకింగ్ లిస్టును రద్దు చేస్తూ, మెయిన్స్ జవాబు పత్రాలను మళ్లీ మూల్యాంకనం చేయాలని ఆదేశాలు ఇచ్చిన విషయం తెలిసిందే. ఆ ఆదేశాలను సవాలు చేస్తూ తెలంగాణ పబ్లిక్ సర్వీస్ కమిషన్ (TGPSC)తో పాటు వివిధ ఉద్యోగాలకు ఎంపికైన అభ్యర్థులు డివిజన్ బెంచ్ను ఆశ్రయించారు.
ఈ అప్పీల్స్పై ఇవాళ విచారణ చేపట్టిన సీజే ధర్మాసనం తుది తీర్పును వెలువరించింది. సింగిల్ బెంచ్ విధించిన స్టేను రద్దు చేస్తూ, గ్రూప్-1 నియామక ప్రక్రియ కొనసాగవచ్చని స్పష్టం చేసింది. ఈ తీర్పుతో వేలాది మంది అభ్యర్థులకు ఊరట లభించగా, ప్రభుత్వ ఉద్యోగాల భర్తీ ప్రక్రియకు కూడా మార్గం సుగమమైంది. ఇకపై గ్రూప్-1 నియామకాలపై ఎలాంటి అడ్డంకులు ఉండవని న్యాయవర్గాలు అభిప్రాయపడుతున్నాయి.
