అనకాపల్లి జిల్లా అచ్యుతాపురంలో భారీ అంతర్జాతీయ సైబర్ మోసం వెలుగులోకి వచ్చింది. అమెరికా పౌరులను లక్ష్యంగా చేసుకుని నకిలీ కాల్ సెంటర్ ద్వారా కోట్లాది రూపాయల మోసాలకు పాల్పడుతున్న ముఠా కార్యకలాపాలను పోలీసులు ఛేదించారు. ఈ కేసుకు సంబంధించిన పూర్తి వివరాలను జిల్లా ఎస్పీ తుహిన్ సిన్హా మీడియాకు వెల్లడించారు. ఈ ముఠా ముసుగు పేరుతో రెండు సంవత్సరాలుగా సైబర్ మోసాలకు పాల్పడుతూ వచ్చినట్లు చెప్పారు.
ఈ నకిలీ కాల్ సెంటర్‌ను ఉత్తరాది రాష్ట్రాలకు చెందిన వ్యక్తులు నిర్వహిస్తున్నట్లు గుర్తించారు. అమెరికాతో పాటు ఇతర విదేశీ పౌరులకు ఫోన్ చేసి నకిలీ సమాచారం ఇచ్చి డబ్బులు దోచుకుంటున్న ఈ ముఠా నెలకు రూ.15 కోట్లు నుంచి రూ.20 కోట్ల వరకు మోసం చేస్తోంది. కాల్ సెంటర్ నుండి చెన్నై, ఢిల్లీ, పట్నా వంటి ప్రధాన నగరాల్లోనూ ముఠా సభ్యుల సంబంధాలు ఉన్నట్లు విచారణలో తేలింది. అంతర్జాతీయ స్థాయిలో నెట్‌వర్క్ విస్తరించిన ఈ ముఠా భద్రతా సంస్థలకూ అతిపెద్ద సవాలుగా మారింది.
ఈ కాల్ సెంటర్‌లో దాదాపు 200 నుంచి 250 మంది వరకు పనిచేస్తున్నారని ఎస్పీ తెలిపారు. ఇప్పటివరకు 33 మందిని పోలీసులు అరెస్టు చేయగా, వారి వద్ద నుంచి రూ.3 లక్షల నగదు, డిజిటల్ పరికరాలు, కంప్యూటర్లు స్వాధీనం చేసుకున్నారు. మిగిలిన నిందితుల కోసం ప్రత్యేక బృందాలు రంగంలోకి దిగాయని వెల్లడించారు. మోసానికి ఉపయోగించిన సాఫ్ట్‌వేర్, వాయిస్ మార్ఫింగ్ టెక్నాలజీ, నకిలీ ఐడెంటిటీ డేటా సేకరణ వంటి అంశాలపై నిఖార్సైన దర్యాప్తు జరుగుతోంది.
ఈ కేసులో కేంద్ర ప్రభుత్వ సైబర్ నేర విభాగం, సీఐడీతో కలిసి సమన్వయంతో చర్యలు తీసుకుంటున్నామని ఎస్పీ స్పష్టం చేశారు. దేశ వ్యాప్తంగా ముఠా నెట్వర్క్‌ను అరికట్టేందుకు ప్రత్యేక చర్యలు తీసుకుంటున్నామని, నిందితులెవ్వరూ బయట తప్పించుకోలేరని హెచ్చరించారు. ఈ సంఘటన స్థానికంగా కలకలం రేపడమే కాక, అంతర్జాతీయ సైబర్ మోసాల పట్ల అధికార యంత్రాంగాన్ని అప్రమత్తం చేసింది.
