మలకపల్లిలో నిర్వహించిన ‘పేదల సేవలో’ కార్యక్రమంలో సీఎం చంద్రబాబు నాయుడు పాల్గొన్నారు. ఈ సందర్భంగా లబ్ధిదారుల ఇళ్లకు స్వయంగా వెళ్లి పింఛన్లు అందజేసిన ఆయన, గ్రామంలో పండుగ వాతావరణం నెలకొని ఉందని అన్నారు. ప్రజా ప్రభుత్వం ఏర్పడ్డాక సంక్షేమ పథకాలను పారదర్శకంగా అమలు చేస్తున్నామని, గత పాలనలో జరిగిన మోసాలకు చరమగీతం పాడుతున్నామని స్పష్టం చేశారు. పింఛన్ల కోసం ప్రజలు ఎదురుచూసే రోజులు పోయాయని, ఇప్పుడు ప్రతినెలా ఒకటో తేదీనే అందుతున్నాయని వివరించారు.
ఆంధ్రప్రదేశ్ రాష్ట్రం పింఛన్ల పంపిణీలో దేశంలోనే ముందు వరుసలో ఉందని ఆయన చెప్పారు. గతంలో రూ.200గా ఉన్న పింఛనును తానే రూ.2000గా చేశానని, ఇప్పుడు రూ.4000కు పెంచామని గుర్తు చేశారు. మంచానికే పరిమితమైనవారికి రూ.15 వేలు, డయాలసిస్ రోగులకు రూ.10 వేలు ఇస్తున్నామని తెలిపారు. ప్రతి నెల రూ.2,750 కోట్లు పింఛన్లకే వెచ్చిస్తున్నామని పేర్కొన్నారు. “తెలంగాణ, కేరళ వంటి రాష్ట్రాలు మన స్థాయికి రావాలంటే ఇంకా ఎంతో దూరం ప్రయాణించాలి” అని వ్యాఖ్యానించారు.
గత ప్రభుత్వంపై ఆయన తీవ్ర విమర్శలు చేశారు. వ్యవస్థలను నిర్వీర్యం చేసిన పాలన అర్థరహితంగా సాగిందని ఆరోపించారు. ఆరోగ్యంగా ఉన్నవారికి కూడా పింఛన్లు ఇచ్చి ప్రజాధనాన్ని దుర్వినియోగం చేశారని విమర్శించారు. గంజాయి ముఠాలకు అనుకూలంగా వ్యవహరించిన నేతలను ప్రశ్నించాలని ప్రజలకు పిలుపునిచ్చారు. వివేకానంద రెడ్డి హత్యను గుండెపోటుగా చిత్రీకరించి నిందితులను బచావు చేయడం వల్లే రాష్ట్రం ప్రమాదంలో పడిందని ఆవేదన వ్యక్తం చేశారు.
అభివృద్ధిపై చర్చ చేస్తూ, రాష్ట్ర పునర్నిర్మాణం లక్ష్యంగా ‘పీ4’ మోడల్‌ను ప్రవేశపెడుతున్నామని తెలిపారు. ప్రభుత్వం-ప్రైవేటు-ప్రజలు-పరోపకారం కలిపి పేదరిక నిర్మూలన సాధ్యమవుతుందన్నారు. ఇందులో భాగంగా చదువు ఆపిన విద్యార్థిని నవ్యశ్రీకి ఠాకూర్ లేబొరేటరీస్ ఉద్యోగ అవకాశాన్ని కల్పించడంతో కార్యక్రమం ప్రత్యేక ఆకర్షణగా నిలిచింది. ఇక కొవ్వూరు నియోజకవర్గ అభివృద్ధికి డిగ్రీ కాలేజీ, 150 పడకల ఆసుపత్రి, లిఫ్ట్ ఇరిగేషన్ వంటి పలు హామీలు చంద్రబాబు ప్రకటించారు.
