ప్రముఖ దర్శకుడు శేఖర్ కమ్ముల దర్శకత్వంలో రూపొందుతున్న ‘కుబేర’ చిత్రంలో అక్కినేని నాగార్జున, తమిళ స్టార్ ధనుష్, రష్మిక మందన్న కలిసి నటిస్తున్న విషయం తెలిసిందే. చెన్నైలో ఇటీవల నిర్వహించిన మీడియా సమావేశంలో నాగార్జున మాట్లాడుతూ తన పాత్ర గురించి ఆసక్తికర విషయాలు వెల్లడించారు. ఈ చిత్రంలో ఆయన ఒక సీబీఐ ఆఫీసర్‌గా కనిపించబోతున్నారు. “నేను మధ్యతరగతి వ్యక్తిగా కనిపిస్తాను. మంచికి, చెడుకి మధ్య సంఘర్షణలో ఉండే పాత్ర ఇది” అని చెప్పారు.
నాగార్జున మాట్లాడుతూ, తన పాత్రకు అనేక కోణాలు ఉన్నాయని, శేఖర్ కమ్ముల దర్శకత్వంలో నటించడం ఎంతో ప్రత్యేకమని అన్నారు. “ఈ పాత్రలో సూక్ష్మమైన భావోద్వేగాలు, నటనకు విస్తృత స్థానం ఉంది. శేఖర్ సార్ దీనిని అద్భుతంగా తీర్చిదిద్దారు” అని ప్రశంసించారు. దర్శకుడు శేఖర్ చిత్రాలపై తనకెంతో అభిమానం ఉన్నట్లు తెలిపారు. “ఆయన సినిమాల్లోని సామాజిక స్పృహ నన్ను ఆకట్టుకుంటుంది. ఆయనతో పనిచేయాలని చాలాకాలంగా ఎదురు చూస్తున్నాను” అన్నారు.
ఇటీవలి కాలంలో మల్టీస్టారర్ చిత్రాలు ఎక్కువవుతున్న నేపథ్యంలో, ఈ చిత్రానికి కూడా అలాంటి స్పెషల్ క్రేజ్ ఏర్పడింది. ధనుష్, రష్మికతో కలిసి నటించడం చాలా ఉత్సాహంగా ఉందని నాగార్జున వెల్లడించారు. “మా తండ్రి ఏఎన్ఆర్ గారు, ఎన్టీఆర్ గారు, కృష్ణ గారు, శోభన్ బాబు గారు కలిసి సినిమాలు చేసిన సంప్రదాయం మళ్లీ ప్రస్తుత తరం స్టార్స్‌లో కనిపించడం చాలా సంతోషకరం” అని వ్యాఖ్యానించారు.
ఈ చిత్రంలో జిమ్ సర్బ్ కీలక పాత్రలో కనిపించబోతున్నారు. దేవి శ్రీ ప్రసాద్ సంగీతం అందించగా, నికేత్ బొమ్మి సినిమాటోగ్రఫీ చేపట్టారు. చైతన్య పింగళి సహ రచయితగా, రామకృష్ణ సబ్బాని, మోనికా నిగోత్రే ప్రొడక్షన్ డిజైనర్లుగా పనిచేస్తున్నారు. ఈ చిత్రానికి సెన్సార్ బోర్డు U/A సర్టిఫికేట్ జారీ చేసింది. నిడివి 181 నిమిషాలుగా ఉండే ‘కుబేర’ చిత్రం జూన్ 20న తెలుగు, తమిళం, హిందీ, కన్నడ, మలయాళ భాషల్లో ప్రపంచవ్యాప్తంగా విడుదల కానుంది.
