కోలీవుడ్ స్టార్ హీరో సూర్య అంటే తెలుగు ప్రేక్షకులకు కూడా ప్రత్యేకమైన అభిమానమే. విభిన్న కథల ఎంపికతో, సహజ నటనతో టాలీవుడ్లోనూ తనకంటూ ప్రత్యేక గుర్తింపు సంపాదించుకున్నాడు. ప్రస్తుతం బ్యాక్ టు బ్యాక్ సినిమాలతో బిజీగా ఉన్న సూర్య, ఇప్పుడు అధికారికంగా టాలీవుడ్లో అడుగుపెట్టేందుకు సిద్ధమవుతున్నాడు. దీంతో ఆయన కొత్త సినిమాలపై అంచనాలు భారీగా పెరిగాయి.
వెంకీ అట్లూరి దర్శకత్వంలో తెరకెక్కుతున్న ‘సూర్య 46’ చిత్రంతో సూర్య టాలీవుడ్ ఎంట్రీ ఇవ్వనున్నాడు. ఈ చిత్రంలో ‘ప్రేమలు’ ఫేం మమితా బైజు హీరోయిన్గా నటిస్తుండగా, సీనియర్ నటి రవీనా టాండన్ కీలక పాత్రలో కనిపించనుంది. భావోద్వేగాలు, బలమైన కథాంశంతో ఈ సినిమా రూపొందుతున్నట్లు సమాచారం. ప్రస్తుతం ఈ చిత్రం షూటింగ్ శరవేగంగా సాగుతోంది.
జీవీ ప్రకాష్ కుమార్ సంగీతం అందిస్తున్న ఈ చిత్రాన్ని సితార ఎంటర్టైన్మెంట్స్, ఫార్చూన్ ఫోర్ సినిమాస్ బ్యానర్లపై నాగవంశి, సాయి సౌజన్య సంయుక్తంగా నిర్మిస్తున్నారు. ప్రముఖ నిర్మాణ సంస్థలు కావడంతో పాటు, టాలెంటెడ్ టీమ్ ఉండటంతో ఈ సినిమాపై ఇండస్ట్రీలో మంచి బజ్ ఏర్పడింది. త్వరలోనే ఈ చిత్రం విడుదల తేదీని ప్రకటించే అవకాశం ఉంది.
ఇదిలా ఉండగా, ‘సూర్య 46’ రిలీజ్ కాకముందే సూర్య మరో తెలుగు సినిమాకు గ్రీన్ సిగ్నల్ ఇచ్చినట్లు వార్తలు వినిపిస్తున్నాయి. ఈ ప్రాజెక్ట్కు సంబంధించిన అధికారిక ప్రకటన ఇంకా రాకపోయినా, కథ నచ్చడంతో సూర్య వెంటనే ఓకే చెప్పినట్లు టాలీవుడ్ వర్గాల్లో టాక్ నడుస్తోంది. ఒకేసారి రెండు తెలుగు సినిమాలు చేయడం ద్వారా సూర్య టాలీవుడ్లో తన మార్కెట్ను మరింత బలోపేతం చేయాలని చూస్తున్నారని సినీ విశ్లేషకులు అభిప్రాయపడుతున్నారు.
