భారత క్రికెట్ జట్టు మాజీ ఆటగాడు, కోచ్ సంజయ్ బంగర్ కుమార్తె అనయ బంగర్ తన జీవితంలో జరిగిన మార్పులను, ముఖ్యంగా క్రికెట్‌లో విరాట్ కోహ్లీతో గడిపిన సమయాన్ని గుర్తుచేసుకున్నారు. అనయ, కోహ్లీ దగ్గర శిక్షణ తీసుకున్న సందర్భాలు, అతడి సూచనల వల్ల తన ఆటలో వచ్చిన మార్పులను హృదయపూర్వకంగా వివరించారు. “ఒకసారి కోహ్లీని ఒత్తిడిని ఎలా ఎదుర్కొంటారు అని అడిగాను. అందుకు అతను తన బలాలపై నమ్మకంతోనే ఆటను నడుపుతానని చెప్పాడు” అని అనయ వెల్లడించారు. ఈ మాటలు తనకు గొప్ప ప్రేరణగా నిలిచాయని చెప్పారు.
అనయ బంగర్, బాల్యంలో ఆర్యన్‌గా జీవించారు. అయితే తన అసలైన లింగాన్ని గుర్తించిన అనంతరం, లైంగిక మార్పిడి ద్వారా అనయగా మారారు. తన లైంగిక మార్పు ప్రయాణంలో ఎదురైన కష్టాలు, క్రికెట్ ఆడే సమయంలో తోటి క్రీడాకారుల నుండి ఎదురైన లైంగిక వేధింపులు ఇటీవల ఆమె మాట్లాడిన సమయంలో ప్రజలను ఆలోచింపజేశాయి. ఆమె చెప్పిన విషయాలు సోషల్ మీడియాలో తీవ్ర చర్చకు దారితీశాయి.
అనయ క్రికెట్‌లో తనను నిరూపించుకోవాలనే సంకల్పంతో ముందుకు సాగుతున్నారు. తన బ్యాటింగ్ ప్రాక్టీస్ వీడియోను ఇటీవల ఆమె సోషల్ మీడియాలో పోస్ట్ చేయగా, నెటిజన్ల నుంచి ఎంతో ప్రోత్సాహకర స్పందన లభించింది. అయితే, 2023లో ఐసీసీ తీసుకున్న నిర్ణయం – ట్రాన్స్‌జెండర్ క్రీడాకారులు మహిళల అంతర్జాతీయ క్రికెట్‌లో పాల్గొనరాదన్న నిబంధన – అనయ ఆశలపై నీళ్లు చల్లింది. ఈ విషయంపై ఆమె ఇప్పటికే అసంతృప్తి వ్యక్తం చేశారు.
సంజయ్ బంగర్, విరాట్ కోహ్లీ మధ్య ఉన్న మైత్రీ వాతావరణం, గతంలో కోహ్లీ ఫామ్ కోల్పోయిన సమయంలో బంగర్ ఇచ్చిన మద్దతు స్పష్టంగా కనిపించాయి. అనయ క్రీడా జీవితానికి ఆ మద్దతు ఇప్పటికీ కొనసాగుతోంది. తండ్రి మార్గదర్శకత్వం, కోహ్లీ ప్రేరణతో ముందుకు సాగుతున్న అనయ, మిగతా ట్రాన్స్‌జెండర్ క్రీడాకారులకు ఒక ఆదర్శంగా నిలవగలవారని పలువురు విశ్వసిస్తున్నారు.
