ప్రముఖ వీడియో షేరింగ్ ప్లాట్‌ఫామ్ అయిన యూట్యూబ్, చిన్న స్థాయి కంటెంట్ క్రియేటర్లకు కొత్త ప్రోత్సాహం ఇవ్వడం కోసం ‘హైప్’ అనే ఫీచర్‌ను భారతదేశంలో ప్రారంభించింది. ఈ ఫీచర్ ద్వారా 500,000 కంటే తక్కువ సబ్‌స్క్రయిబర్లు ఉన్న ఛానెళ్లకు ఎక్కువ విజిబిలిటీ లభించనుంది. భారత్‌లో 50 కోట్లకు పైగా యూట్యూబ్ యాక్టివ్ వినియోగదారులు ఉన్న నేపథ్యంలో, ఈ కొత్త ఫీచర్ చిన్న క్రియేటర్లకు తమ కంటెంట్‌ను పెద్ద వేదికపై చూపించే అద్భుతమైన అవకాశాన్ని అందిస్తోంది.
‘హైప్’ ఫీచర్ ప్రత్యేకత ఏమిటంటే, ప్రేక్షకులు క్రియేటర్ల వీడియోలను ఓటింగ్ ద్వారా ‘హైప్’ చేయవచ్చు. ఈ ఓట్ల ఆధారంగా యూట్యూబ్ అల్గారిథమ్ ఆ వీడియోలను మరింత పెద్ద ప్రేక్షకులకు రికమెండ్ చేస్తుంది. అయితే, ఈ ఫీచర్‌లో పాల్గొనాలంటే క్రియేటర్లు కమ్యూనిటీ గైడ్‌లైన్స్‌ను పాటించాలి. అంతేగాక, వీడియోలు ఒరిజినల్ కంటెంట్‌తో ఉండాలి. దీని ద్వారా చిన్న క్రియేటర్లు అల్గారిథమ్‌లో కనిపించకుండా పోయే సమస్యను అధిగమించి, తమ టాలెంట్‌ను చాటుకునే అవకాశాన్ని పొందుతున్నారు.
భారతదేశం యూట్యూబ్‌కు అతిపెద్ద మార్కెట్‌గా మారిన నేపథ్యంలో, ఈ ఫీచర్‌ను ఇక్కడ ప్రయోగాత్మకంగా ప్రారంభించారు. భారత క్రియేటర్లు వివిధ భాషలు, సంస్కృతులు, కంటెంట్ స్టైళ్లతో ప్రపంచవ్యాప్తంగా ప్రేక్షకులను ఆకట్టుకుంటున్నారు. ఉదాహరణకు, యషి టాంక్ తన చానెల్ ద్వారా 30 లక్షల మంది సబ్‌స్క్రయిబర్లను సంపాదించగా, ఊర్మిళా నింబాల్కర్ తన జీవనశైలి మరియు విద్యారంగ కంటెంట్‌తో 9 లక్షల మంది అభిమానులను సొంతం చేసుకున్నారు.
ఈ ‘హైప్’ ఫీచర్ చిన్న క్రియేటర్లకు కేవలం రీచ్‌ మాత్రమే కాదు, ఆదాయాన్ని పెంచుకునే అవకాశాన్ని కూడా ఇస్తోంది. 2023లో విడుదలైన ఆక్స్‌ఫర్డ్ ఎకనామిక్స్ రిపోర్ట్ ప్రకారం, యూట్యూబ్ భారతదేశంలో 9 లక్షల ఫుల్‌టైమ్ ఉద్యోగాలకు మద్దతు ఇస్తోంది. ‘హైప్’ వంటి ఫీచర్లు యువ క్రియేటర్లకు కొత్త వృత్తి మార్గాలను అన్వేషించే వీలునిస్తూ, భారతీయ కంటెంట్‌ను గ్లోబల్ స్థాయిలో ప్రదర్శించే వేదికగా నిలుస్తున్నాయి.
