తెలంగాణ బీజేపీ నూతన అధ్యక్షుడి ఎంపికపై నెలరోజులుగా సాగుతున్న ఉత్కంఠకు ఇక తెరపడనుంది. మంగళవారం ఉదయం హైదరాబాద్‌లో జరిగే సమావేశంలో కొత్త అధ్యక్షుడి పేరును అధికారికంగా ప్రకటించనున్నట్టు పార్టీ నాయకత్వం తెలిపింది. ఈ ఎన్నికల ప్రక్రియపై వస్తున్న ఆరోపణలను పార్టీ తీవ్రంగా ఖండిస్తోంది. ఎన్నికలు పూర్తిగా పారదర్శకంగా, నిబంధనల ప్రకారమే జరుగుతున్నాయని నేతలు స్పష్టం చేశారు.
ఈ అంశంపై ఎమ్మెల్యే రాజాసింగ్ సంచలన ఆరోపణలు చేశారు. “తాను నామినేషన్ వేయాలని భావించినపుడు అడ్డుకున్నారు,” అని ఆరోపించారు. ఈ వ్యాఖ్యలు పార్టీ వర్గాల్లో కలకలం రేపగా, ఆయన ఆరోపణలపై పలువురు నేతలు ఘాటుగా స్పందించారు. బీజేపీ ఎమ్మెల్యే పాయల్ శంకర్ మాట్లాడుతూ, ప్రతి ఒక్కరికీ నామినేషన్ వేసే అవకాశమిచ్చామని, 10 మంది ప్రతిపాదకులు అవసరమన్న నిబంధనను స్పష్టంగా పేర్కొన్నారు.
పార్టీ రాష్ట్ర ప్రధాన కార్యదర్శి ప్రేమేందర్ రెడ్డి మాట్లాడుతూ, మంగళవారం ఉదయం హైదరాబాద్‌లోని వేద కన్వెన్షన్ కేంద్రంలో నూతన రాష్ట్ర అధ్యక్షుడి పేరును ప్రకటించనున్నట్టు వెల్లడించారు. మీడియా వర్గాల్లో చక్కర్లు కొడుతున్న ఊహాగానాల్లో నిజమెక్కువ లేదని, నేతల మధ్య చర్చలు పూర్తయ్యాయని చెప్పారు. కొత్త నాయకత్వం పార్టీ బలోపేతానికి దోహదం చేస్తుందని ఆశాభావం వ్యక్తం చేశారు.
ఈ మధ్య బీజేపీ అధికార ప్రతినిధి రాణి రుద్రమ రాజాసింగ్ ఆరోపణలను తీవ్రంగా ఖండించారు. ఆయన చేసిన వ్యాఖ్యలలో వాస్తవం లేదని, పార్టీ క్రమశిక్షణను అతిక్రమించడం శోచనీయమని విమర్శించారు. పార్టీ సిద్ధాంతాలే ముఖ్యం, వ్యక్తిగత ప్రాధాన్యతలు కాదు అని పేర్కొన్నారు. ఎమ్మెల్యే పదవికి రాజీనామా చేయాలనుకుంటే, స్పీకర్‌కు లేఖ ఇవ్వాలని సూచించారు. పార్టీ అధ్యక్షుడికి ఇచ్చిన రాజీనామా లేఖను జాతీయ నాయకత్వానికి పంపుతున్నట్టు తెలిపారు.
