తెలంగాణ నీటిపారుదల శాఖలో కీలక పరిణామం చోటు చేసుకుంది. ఇంజినీర్‌ ఇన్‌ చీఫ్ (ఈఎన్సీ) జనరల్‌ హోదాలో ఉన్న గోసుల అనిల్ కుమార్‌ను రాష్ట్ర ప్రభుత్వం బదిలీ చేసింది. ఆయనకు తదుపరి పోస్టింగ్ కేటాయించకుండా తక్షణమే ప్రభుత్వానికి హాజరుకావాలని ఉత్తర్వులు జారీ చేశారు. ఈ నిర్ణయం అకస్మాత్తుగా వచ్చినప్పటికీ, మెదిగడ్డ బ్యారేజీ గ్రౌటింగ్‌కు సంబంధించి ఇటీవల తలెత్తిన వివాదం దీనికి ప్రధాన కారణంగా చెబుతున్నారు.
జాతీయ ఆనకట్టల భద్రతా అథారిటీ (ఎన్డీఎస్ఏ) నివేదిక ప్రకారం, మెదిగడ్డ బ్యారేజీలో గ్రౌటింగ్ పనులు నిర్మాణ సమగ్ర పరీక్షలకు ఆటంకంగా మారాయని స్పష్టంగా పేర్కొంది. ఈ పనులు ఎవరి ఆదేశాలతో జరిగాయన్న దానిపై ప్రభుత్వం అసంతృప్తిగా ఉన్నట్లు సమాచారం. ముఖ్యమంత్రి నేతృత్వంలోని ఉన్నతస్థాయి సమీక్షా సమావేశంలో ఈ అంశం కీలకంగా చర్చకు వచ్చినట్లు చెబుతున్నారు.
ఈ వివాదం మాత్రమే కాకుండా, మరో అంశం కూడా అనిల్ కుమార్ బదిలీకి కారణమైంది. ఈఈ నూనె శ్రీధర్‌ను బదిలీ చేసినా, ఆయనను పాత స్థానంలోనే కొనసాగేందుకు అనిల్ కుమార్ మౌన అనుమతి ఇచ్చారని ఆరోపణలు ఉన్నాయి. వ్యవస్థాపక విధానాలకు వ్యతిరేకంగా వ్యవహరించినట్లు ప్రభుత్వం భావించి ఆయనపై ఈ చర్యలు తీసుకుంది.
తాజా ఉత్తర్వులతో అంజద్ హుస్సేన్‌కు ఈఎన్సీ జనరల్‌ హోదాలో పూర్తి స్థాయి అదనపు బాధ్యతలు అప్పగించారు. ప్రస్తుతం ఆయన చీఫ్ ఇంజినీర్‌గా సేవలందిస్తున్నారు. అదనంగా, ఈఎన్సీ (అడ్మిన్‌)గా కూడా ఇప్పటికే బాధ్యతలు నిర్వహిస్తున్న అంజద్ హుస్సేన్‌ ఇప్పుడు రాష్ట్ర నీటిపారుదల శాఖలో రెండు కీలక హోదాలలో కొనసాగనున్నారు.
