హైదరాబాద్ నగరంలో విదేశీయుల మోసాలకు సంబంధించి కొత్త కోణం బయటపడింది. గతంలో గల్ఫ్ షేక్‌లు పేద యువతులను పెళ్లిళ్ల పేరుతో మోసం చేసిన తరహాలోనే, ఇప్పుడు కొందరు నైజీరియన్లు కూడా కాంట్రాక్ట్ పెళ్లిళ్ల పద్ధతికి పాల్పడుతున్నారని పోలీసులు గుర్తించారు. వీరి లక్ష్యం వీసా గడువు ముగిసిన తర్వాత భారత్‌లోనే చట్టవిరుద్ధంగా కొనసాగించడం అని పోలీసులు తెలిపారు. ఈ మార్గంలో యువతులను వాడుకుని, వారి జీవితాలను నాశనం చేస్తున్నట్లు అధికారులు వెల్లడించారు.
విద్య, వ్యాపారం వంటి పనుల పేర్లతో భారత్‌కి వస్తున్న కొందరు నైజీరియన్లు హైదరాబాద్‌లో సైబర్ నేరాలు, డ్రగ్స్ స్మగ్లింగ్ వంటి చట్టవ్యతిరేక కార్యకలాపాలకు జారుతున్నారు. వీరి వీసా గడువు ముగిసినప్పటికీ, ఇక్కడే ఉండిపోవాలని భావిస్తూ స్థానికులతో గొడవలు పడటం, డ్రగ్స్ కేసుల్లో ఉద్దేశపూర్వకంగా చిక్కుకోవడం లాంటి పథకాలతో న్యాయస్థానాల చుట్టూ తిరుగుతూ సమయం గడుపుతున్నారు. ఇదే సమయంలో కొత్తగా ‘కాంట్రాక్ట్ పెళ్లిళ్లు’ అనే దందా మొదలైందని పోలీసులు గుర్తించారు.
ఈ కాంట్రాక్ట్ పెళ్లిళ్లకు దళారులు కీలక పాత్ర పోషిస్తున్నారు. నైజీరియన్లు అక్రమంగా సంపాదించిన డబ్బును దళారుల చేతికి ఇచ్చి, పేద కుటుంబాలను లక్ష్యంగా చేసుకుంటున్నారు. డబ్బు ఆశ చూపి కుటుంబ పెద్దలను ఒప్పించి, వారి ఇంట్లోని యువతులను కాంట్రాక్ట్ పెళ్లిళ్లకు ఒప్పిస్తారు. కొంతకాలం గడిపిన తర్వాత ఆ యువతులను వదిలేసి పరారవుతారు. ఇలా మోసపోతున్న యువతుల భవిష్యత్తు అంధకారంలోకి నెట్టబడుతోంది.
పెళ్లిళ్ల పేరుతో జరుగుతున్న ఈ మోసాలపై హైదరాబాద్ పోలీసులు ప్రత్యేక దృష్టి సారించారు. రాజస్థాన్ వంటి ప్రాంతాల్లో ఉండి హైదరాబాద్‌లో రాకపోకలు సాగిస్తున్న నైజీరియన్ ముఠాలపై పోలీసుల వద్దకు కీలక సమాచారం చేరింది. ఇప్పటికే ఆధారాలు సేకరించడం ప్రారంభించిన పోలీసులు, వీరిని త్వరలోనే అరెస్ట్ చేయాలని చర్యలు చేపట్టారు. నిరుపేద యువతులను ఇలా మోసగోట్లు చేయడం అనేది తీవ్రమైన నేరమని పోలీసులు హెచ్చరించారు.
